Nenoka Natudni Ft. Megastar Chiranjeevi in Rangamarthanda Movie : క్రియేటివ్ డైరెక్టర్ కృష్ణవంశీ తెరకెక్కిస్తున్న చిత్రం ‘రంగమార్తాండ’. రంగస్థల కళాకారుల జీవితాల చుట్టూ అల్లిన ఈ కథలో ప్రకాష్ రాజ్, బ్రహ్మానందం, రమ్యకృష్ణ, రాహుల్ సిప్లిగంజ్, శివాని రాజశేఖర్, ఆదర్శ్ బాలకృష్ణ, అలీ రెజ, అనసూయ, కీలక పాత్రల్లో కనిపించబోతున్నారు. మరాఠీ చిత్రం ‘నట సమ్రాట్’కు ఇది రీమేక్. ఈ మూవీలోని ఫస్ట్ సింగల్ (షాయరీ) ‘నేనొక నటుడ్ని’ బుధవారం విడుదలైంది. మెగస్టార్ చిరంజీవి తనదైన శైలిలో చెప్పిన ఈ షాయరీ ని ప్రముఖ రచయిత లక్ష్మీ భూపాల రాశారు. మాస్ట్రో ఇళయరాజా నేపధ్య సంగీతం అందించారు.
ఈ షాయరీ వినే ప్రతి నటుడు తన కోసమే రాశారని భావించేలా లక్ష్మీ భూపాల ఎంతో అర్థవంతంగా దీనిని రాయడం విశేషం. మెగాస్టార్ అద్భుతంగా తన గొంతులో నవరసాలు పలికించి ఈ షాయిరీకి ప్రాణం పోశారు. క్రియేటివ్ డైరెక్టర్ కృష్ణవంశీ ఒక తపస్సులా పూర్తి చేసిన ఈ రంగమార్తాండ సినిమాకు ఈ షాయరీ అద్దం పడుతోంది. ఈ పాటను లక్ష్మీ భూపాలతో రాయించగానే తన మదిలో చిరంజీవే మెదిలారని, ఆయన్ని అడగగానే పాడటానికి అంగీకరించడం ఆనందాన్ని కలిగించిందని ఇటీవల కృష్ణవంశీ ఎన్టీవీతో తెలిపారు.