హైదరాబాద్: మూవీ ఆర్టిస్ట్స్ అసోసియేషన్‌ ‘మా’ ఎన్నికలు ముగిసి దాదాపు రెండు వారాలు అవుతున్నా పరిశ్రమలో వివాదాలు సద్దుమణగడం లేదు. మూవీ ఆర్టిస్ట్స్ అసోసియేషన్‌ ఎలక్షన్‌‌పై ప్రకాశ్ రాజ్ మరోమారు కామెంట్ చేశారు. ‘మా’ ఎన్నికల్లో వైకాపా జోక్యం ఉందంటూ శుక్రవారం మధ్యాహ్నం నటుడు ప్రకాశ్‌రాజ్‌ ఆరోపణలు చేశారు. ఎన్నిక జరిగిన తీరుపై అభ్యంతరం వ్యక్తం చేసిన ఆయన.. ఎలక్షన్ రోజు సీసీటీవీ వీడియో ఫుటేజీ ఇవ్వాల్సిందిగా ఈసీ కృష్ణ మోహన్‌ను కోరారు. దీంతో కృష్ణ మోహన్ ప్రకాశ్ రాజ్‌‌కు సీసీటీవీ ఫుటేజీని చూపించారు. కానీ సగం వరకే చూసిన ప్రకాశ్ రాజ్.. మిగిలిన వీడియోను తర్వాత చూస్తామన్నారు. ఈ విషయంపై తాజాగా ఆయన ట్వీట్ చేశారు.
#MaaElections2021 .. dear Election officer Krishna mohan garu .. this is just the beginning.. give us the CC footage.. we will let the world know what happened.. how the elections were conducted #justasking pic.twitter.com/ew8waPyAXN
— Prakash Raj (@prakashraaj) October 22, 2021
సీసీటీవీ ఫుటేజీని తమకు ఇవ్వాలని ఎలక్షన్ ఆఫీసర్ కృష్ణ మోహన్‌ను కోరిన ప్రకాశ్ రాజ్.. పోలింగ్‌ బూత్‌లో అసలేం జరిగిందో ప్రపంచానికి తెలియజేయనివ్వండి. ఇది కేవలం ప్రారంభమేనన్నారు. ఈ ట్వీట్‌కు ‘మా’ ఎన్నిక నాటి ఫొటోలను జత చేశారు. ఈ ఫొటోల్లో సీనియర్ హీరో మంచు మోహన్ బాబు పక్కన ఓ నూకల సాంబశివరావు అనే వ్యక్తిని చూడొచ్చు. అదే వ్యక్తి వైసీపీ కండువాతో జగన్ పక్కన ఉండటాన్ని కూడా గమనించొచ్చు. ఆ వ్యక్తిపై జగ్గయ్యపేట పోలీస్ స్టేషన్ పరిధిలో రౌడీ షీటర్ కేసులు ఉన్నాయని ప్రకాశ్ రాజ్ పేర్కొన్నారు. ఈ మేరకు సదరు కంప్లయింట్ కాపీని ఆయన ట్వీట్ చేశారు.