తెలుగు సినీ అభిమానులు సైతం ఆసక్తిగా ఎదురు చూస్తున్న మూవీ ‘ఆచార్య’. చిరంజీవి కథానాయకుడిగా కొరటాల శివ దర్శకత్వంలో తెరకెక్కిన ఈ మూవీ రామ్ చరణ్ ‘సిద్ధ’ పాత్ర కి సంబంధించిన టీజర్‌ను మేకర్స్ ఆదివారం సాయంత్రం విడుదల చేశారు.
ఈ టీజర్‌లో రామ్‌చరణ్ పవర్‌ఫుల్ లుక్‌లో కనిపిస్తున్నాడు. బ్యాక్ గ్రౌండ్లో వచ్చే శ్లోకంతో సిద్ధ క్యారెక్టరైజేషన్‌ని ఎలివేట్ చేశారు. ‘ధర్మస్థలికి ఆపదొస్తే.. అది జయించడానికి అమ్మోరు తల్లే మాలో ఆవహించి ముందుకు పంపుద్ది’ అంటూ రామ్ చరణ్ చెప్పిన డైలాగ్ అలరిస్తోంది. ఈ టీజర్ చూస్తుంటే మెగా అభిమానులకు గూస్ బంప్స్ తెచ్చిపెట్టడం ఖాయంగా కనిపిస్తోంది. టీజర్‌లో బ్యాక్‌గ్రౌండ్ మ్యూజిక్ కూడా అదిరిపోయిందనే చెప్పాలి. టీజర్ ఆఖర్లో చిరంజీవి కూడా కనిపించాడు.
ఇక భారీ బడ్జెట్‌తో తెరకెక్కిస్తున్న ఈ మూవీకి రామ్ చరణ్ నిర్మాతగా వ్యవహరిస్తూనే మూవీలో ఎంతో కీలకమైన సిద్ద అనే పాత్రలో కూడా నటిస్తున్నాడు. ఈ మూవీలో చిరంజీవికి జోడీగా కాజల్ అగర్వాల్ నటిస్తుండగా.. రామ్ చరణ్ సరసన పూజ హెగ్డే కనిపించనుంది. నిరంజన్ రెడ్డితో కలిసి రామ్ చరణ్ ఈ మూవీని నిర్మిస్తుండగా.. మణిశర్మ సంగీతం అందిస్తున్నాడు.. ప్రస్తుతం పోస్ట్ ప్రొడక్షన్ వర్క్ జరుపుకుంటున్న ‘ఆచార్య’ ఫిబ్రవరి 4న భారీ స్థాయిలో విడుదల కానుంది.